Kalonji kya hai aur Kalonji ke fawaid?

Kalonji kya hai aur Kalonji ke fawaid?

Kalonji ek qisam ki gaas ka beejh hai. iss ka poda sonf se mashaba, khudro aur chalis centimeter boland hota hai, phool zardi mayel, beejhoon ka rang sayaa (Black) aur shakal payaz ke beejhoon se milti hai. yahi waja hai ke bauz log inhien ka hi beejh samajhte hain. Kalonji ke beejhoon ki khushboo b tez aur shafiyi taseer 7 saal tak qayim rehti hai. Sahih Kalonji ki pehchaan ye hai ke agar isse safaed kaghaz (white paper) main lapet ker rakhien to iss per chiknaayi ke daagh dabbhe lag jate hain.

Kalonji ke beejh khushboodar aur zaiqe ke liye bhi isstamaal kiye jate hain aur achar aur chatni main parhe huwe cchote cchote tikonay sayya beejh kalonji hi ke hote hain, jo apne andar beshumaar fawaid rakhte hain. yeh sari-ul-asar yani bohut jald asar kerte hain.
Itbaaye qadeem kalonji aur iss ke beejhoon ke isstamaal se khub waqif hain. Maloom tareeh main roomi in ka isstamaal kerte the, Qadeem yunaani aur arab hukma ne kalonji ko rome hi se hasil kiya kiya.

Aur phir ye puri dunia main kaasht aur isstamaal hone lagi. tibi qutab se maloom hota hai ke qadeem yunani itba kalonji ke beejh ko meday aur pet ke amraaz, maslan Riyah, Gas ka hona, Aanton ka dard, Kasrat Ayam, Astasqa, Nisayaan, Resha, Damaghi Kamzori, Falaj aur Afzaish Doodh ke liye isstamaal kraate rahe hain. RASOOL ALLAH (SAWW) ke hawale se qutab seerat main aaya hai ke Aap (SAWW) kabhi kabhi shehad ke sharbat ke saath kalonji isstamaal farmaate the.

Hazrat Salam bin Abdullah apne walid Hazrat Abdullah bin Umar se rawaiyat kerte hain ke RASOOL ALLAH (SAWW) ne farmaya" Tum in kaale Daano (Kalonji) ko apne upar lazim ker lo ke in main mot ke siwa har marz ka alaaj hai".

Kalonji ki ye bhi ek aham haasiyat hai ke yeh garam aur sard dono tarah ke amraaz main mufeed hai. Jab ke iss ki apni taseer garam hai aur sardi se hone wale tamaam amraaz main mufeed hai.

Kalonji nizaam hazm ki aslah ke liye akseer ka darja rakhti hai. Riyah, Gas aur Ba-d-Hazmi main iss se bohut faida hota hai. Woh log jin ko khane ke baad pet main Bhari Pann, Gas ya Riyah bhar jane aur Aphaare ki shikaayat mahsoos hoti ho, Kalonji ka safoof teen gram khane ke baad isstamaal kerien to na sirf yeh shikaayat jati rahi gi balke meday ki aslah bhi ho gi. Kalonji ko sirke ke saath mila ker khane se pet ke keeray mar jate hain.

Sardiyoon ke mosam main jab zukaam hone lagta hai to aisi sorat main kalonji ko bhoon ker bareek pees lien aur kapray ki potli bana ker baar baar sunghnay se zukaam dur ho jata hai. Agar ccheenkien aa rahi hoon to kalonji bhoon ker bareek pees ker Roghni Zetoon main mila ker iss ke teen chaar qatray naak main tapkanay se cchinkeen jati rahtien hain. Kalonji madarbol (Peshaab Aawar) bhi hai. Iss ka joshanda shehad main mila ker peene se Gurde aur Masaane ki Pathri bhi harj ho jati hai.

Agar daanton main thanda paani lagne ki shikaayat ho to Kalonji ko sirke main josh de ker kuliyaan kerne se faida ponchta hai. Chehray ki rangat main nikhaar aur jild saaf kerne ke liye kalonji ko bareek pees ker ghee main mila ker chehray per lep kerne se faida hota hai. Agar Roghan Zetoon main mila ker isstamaal kiya jaye to aur ziyaada faida hota hai. Aaj kal nojawaan larkon aur larkiyon main Keel, Daanay aur Mahaason ki Shikaayat aam hai. Aise Nojawaan Larkay aur Larkiyaan kalonji bareek pees ker, Sirke main mila ker sone se pehle chehray per lep kerien aur subah chehra dho liya kerien INSHALLAH chand dinoo main baray acchay asraat samne aayien ge. Iss tarah lep kerne se na sirf chehray ki rangat saaf aur shafaaf ho gi balke mahaasay bhi khatam hoon jayien ge aur jild main nikhaar bhi aaye ga.